Op Oedingsch Wat mer 1933 noch net kannde

Nau hät mech jömmes vertelle wolle, wie de Lütt 1933 jeläwd hant. Eijentlich wollt hä mech äwer wiese, wat mer vör acht Joehrzehnte noch net kannde. Ens kieke, wat ech dovan behalde han.

Also all die, die vör 1933 jeboore worde, kannde noch kin Fernsehen, kin Tiefkühlkost, on och kin Kontaktlinse. Autos hadde bloos en paar Privilijierte, on die brugde kin Ängs vör Radarfalle hann. Häzkranke kosse net met en künstlich Häz räekene. Börsch mt Ohrringe, die haie se uutjelacht.

" Made in Germany" wor en de janze Weld bekennt, mar "Made in Japan" stong för billije Schrott. Mer leepe all op de Strooet eröm, wenn mer vör enne Jrosche en Ies of en Fläsch Klickerwater kooepe kosse. För fönf Penning kreij mer am Büedsche en Hangkvoll Lutschbrocke. Enne Jrosche deng en Briefmark för enne Brief koste, vör twentisch Penning fuhr mer möt de Lektrisch van Oeding bös Zinttönis. Hai ech alleen all enne Computer jehatt, wör ech velleits hütt noch Millionär. Dat Wooerd Software för all dat, wat mer net aanpacke kann, on dat Wooerd Non Food för all dat, wat net äete on drenke kann, wore noch net erfonge. Mer kannde och net Bejriffe wie Hausmann, Emanzipation, Pämpers of Aussteiger. Weightwatschers kannde mer och net, en des Tied worde de Mensche sellde dick. Wenn min Moder en des Tied de jroote Wäsch hatt, dann wor dat enne jehörije Stalp. En elektrische Wäschmaschien möt ongerschiedliche Projramme joew et net. De fädije Wäsch koss Moder net en enne lektrische Trockner deue. De Wäsch moss se om Söller ophange on waade, bes se drüsch word. Et Büjelieser word dann möt jleunije Koehle heet jemekt. Hütt kammer son Denger noch antiquarisch koope.

Mar, mer hant dat all jood öwerläwd on freue os, dat all dä Stalp van de 30er Johre hütt net mehr in es. On dodrop solle mer aanstoote. KÖEB UUT OEDING

(RP)
Meistgelesen
Neueste Artikel
Zum Thema
Aus dem Ressort