Op Oedingsch Fastetied

Krefeld · Nau hant mer wier de Fastetied. Die jeht van Äschermettwoch bes Pooesche. So mennije Lütt höre en des Tied op, Pänneke fett let läwe.Of versöeke et. Freiwillich!

Angersch es dat bei Männi. Hä es so breet als wie lang . Mar sin Frönde sage:" "Männi, do bes ja nit te dick, do bes bloß wat te kleen!" Dat send Sprüch! De Laas hät Männi. Hä kann all lang net mer donn, wat hä well. Sech de Schuhn sälvs tomaake, es net mer drin. Em Kino of Theater fengt hä all lang kinne richtije Platz mehr. Op enne Torel öwer en enge Trepp klömme, dat jeht och net mehr. On, on, on!

Mar em Äete on Drenke es hä Weltmeester! Wat Lieske em vörsette deet, dat schmeckt emmer. Männi kann henger sinne Teller Pinau speele on en Fläschke Bier of Wien so effkes en sinne Maag kippe. Ohne te schlucke.

Nau mäkt Männi en "Fastenkur". Hä mott hongere. Net freiwillich. Nä, sinne Dokter verlangde dat: "Sonst werden Sie nicht alt!" On dann de Verjliek van dä Polo, dä enne Wohnwaare trecke soll, mit et Häz, wat de Kilos versorje möss. Van de Knöek, die dat all büere mösse, janet te spräeke. "Eine Woche nur Mineralwasser, fünf Wochen nur 800 Kalorien, dann können wir über 1200 sprechen." Männi verloor nau de Pönkes, jedde Wäek en paar. Dö Doktor wor tofreene.

Mar et wor schwoor. Männi wos janet mehr, wat joo-e Senn wor. Doför kannde hä van jedde Bisse de Kalorie, et Eiweiß, et Fett on et Kohlejedöns. Och de Vitaminschers. Wenn net, dann woss Lieske dat. Et wor enne Osel.

No säes Wäeke wor Männi dat alles satt. Hä jeng no sinne Doktor. "Wenn dat met de Kalorie so wier jeht, dann mott ech bald ennet Jraas biete", lamentierde hä. On wat sait dä Doktor? "Ins Gras beißen? Kein Problem, Gras hat nur sieben Kalorien." KÖEB UUT OEDING

(RP)
Meistgelesen
Neueste Artikel
Zum Thema
Aus dem Ressort